احمدنگر میں مولانا ابوالکلام آزاد کو خراجِ عقیدت، تعلیم کے فروغ میں ان کی خدمات کو خراجِ تحسین

مخدوم سوسائٹی کی جانب سے مولانا ابوالکلام آزاد کو خراجِ عقیدت

مولانا آزاد کی کوششوں سے تعلیم کے دروازے سب کے لیے کھلے: ڈاکٹر پروفیسر محبوب سید

احمدنگر (عابد خان): ہندوستان کے پہلے وزیرِ تعلیم اور بھارت رتن مولانا ابوالکلام آزاد نے ملک کی تعلیمی ترقی اور نئی نسل کی بہتر تربیت کو پیشِ نظر رکھتے ہوئے تعلیمی پالیسی مرتب کی۔ انہوں نے تعلیم کو قومی ترقی کا اہم ذریعہ بنایا، جس کے نتیجے میں ملک میں تعلیمی انقلاب کی بنیاد پڑی اور تعلیم کے دروازے ہر طبقے کے لیے کھلنے لگے۔ اسی لیے انہیں ملک میں تعلیم کے فروغ کے بانیوں میں شمار کیا جاتا ہے۔ ان خیالات کا اظہار ڈاکٹر پروفیسر محبوب سید نے کیا۔

مجاہدِ آزادی اور بھارت رتن مولانا ابوالکلام آزاد کے یومِ پیدائش کے موقع پر مخدوم ایجوکیشن اینڈ ویلفیئر سوسائٹی، رحمت سلطان فاؤنڈیشن، احمدنگر ضلع اردو ساہتیہ پریشد اور ساوتری فاطمہ سدبھاونا منچ کے مشترکہ زیرِ اہتمام رحمت سلطان ہال میں ایک تقریب منعقد کی گئی، جس میں مولانا آزاد کو خراجِ عقیدت پیش کیا گیا۔

تقریب میں مہمانِ خصوصی کی حیثیت سے خطاب کرتے ہوئے ڈاکٹر پروفیسر محبوب سید نے کہا کہ مولانا آزاد تعلیم کو ملک کی ترقی کی بنیادی ضرورت سمجھتے تھے۔ انہوں نے پارلیمنٹ میں اس بات پر زور دیا تھا کہ قومی بجٹ میں تعلیم کو نمایاں مقام دیا جانا چاہیے اور خوراک و لباس کے بعد تعلیم کو ترجیح دی جانی چاہیے۔ ان کا موقف تھا کہ ملک کے پانچ سالہ منصوبوں میں زراعت، صنعت، بجلی اور ذرائع ابلاغ کی ترقی کے ساتھ تعلیم پر بھی یکساں توجہ دی جائے، تاکہ نئی نسل کی بہتر تربیت اور ملک کا روشن مستقبل یقینی بنایا جا سکے۔

انہوں نے مزید کہا کہ مولانا آزاد نے اپنے دورِ وزارتِ تعلیم میں تعلیمی بجٹ میں اضافے کے لیے کوششیں کیں۔ ابتدائی دور میں ملک کا تعلیمی بجٹ تقریباً دو کروڑ روپے تھا، جو 1958ء تک بڑھ کر 30 کروڑ روپے ہو گیا۔ انہوں نے ملک میں نئے تعلیمی اداروں کے قیام اور موجودہ اداروں کی ترقی کے لیے بھی اہم اقدامات کیے۔

اس موقع پر پروفیسر نوید بیجاپورے، حاجی شوکت تمبولی، سید خلیل اور پروین سوناونے نے بھی مولانا ابوالکلام آزاد کی زندگی، جدوجہد اور تعلیمی خدمات کے مختلف پہلوؤں پر اپنے خیالات کا اظہار کیا۔

تقریب میں تمبولی حج ٹورز اینڈ ٹریولز کے ڈائریکٹر حاجی شوکت بھائی تمبولی، احمدنگر ہسٹری لورز ایسوسی ایشن کے ابھیجیت واگھ، تنظیمِ اردو ادب کے صدر سید خلیل، ڈاکٹر پرشانت شندے، سلیم سہارا، صحافی افضل سید، سکے جمع کرنے کے شوقین پنکج مہر، کتابوں کے شائق شبیر شیخ، تنویر چشمہ والا، شفقت سید اور مکند نگر سینئر ایسوسی ایشن کے اسماعیل شیخ سمیت متعدد معزز شخصیات موجود تھیں۔

پروگرام میں ایڈووکیٹ حنیف بابوجی، فیروز شیخ، نعیم سردار، وہاب سید، سعید خان، سنجے بھنگاردیو، صحافی ظہیر سید، ابرار شیخ، جاوید ماسٹر، کلیم شیخ اور دیگر معززین نے بھی شرکت کی۔

پروگرام کا افتتاح مولانا آزاد فیسٹیول کے بانی عابد خان کے ہاتھوں عمل میں آیا، جبکہ نظامت ڈاکٹر قمر سُرور نے انجام دی۔ آخر میں شفقت سید نے اظہارِ تشکر کیا۔

رابطہ برائے تشہیر:
عابد خان
9860477869